Dil mein jab bhi khayaal koi naya aata hai,
Man na jaane kis dar se ghabraata hai.
Sochtaa hai ki kahin mehnat bekaar na ho jaae,
Aur is par kahi mera tiraskaar na ho jaae.
Ae raahi, tiraskaar se itna kyun tu darta hai,
Aag mein tapkar hi toh aakhir, sonaa nikharta hai.
Yeh samaaj toh aadat se majboor hai,
Na jaane kab se iska yahi dastoor hai.
Ki pehle pehl yeh nootan ka tiraskaar karta hai,
Aur phir baad mein use hi namaskaar karta hai.
Sai baba , kabir aadi santon ko, pehle taanon ki saugaat mili thi,
Mazaak banaate hue inka, hansi chehron par khili thi.
Par aaj yeh sabhi poojniye, avtaar hain,
Aur ishwariya shreni mein naam inka shumar hai.
Newton ko bhi shuruaat mein, paagal kahaa jaata tha,
Aur baaton par unki dhyaan dia nahi jaata tha,
Par aaj sarvashreshta vaigyaanikon mein,unka naam aata hai,
Naam se pehle unke 'Sir' likhaa jaata hai.
Toh dar mat ae raahi, tu is tiraskaar se,
Na jod kabhi bhi ise tu apni haar se,
Kyunki yahaan tiraskaar buniyaad hai,namaskaar ki,
Saakshi hai, hone waale chamatkaar ki.
Tu bas binaa dare, aagey badhta chal,
Behichak, bas apne man ki karta chal .
Ek din phir aisaa bhi zaroor aaega,
Jab yeh zamaana tere aagey jhuk jaaega.
Woh tiraskaar, tab namaskaar ban chuka hoga,
Aur is jag me naam tera , phir amar hoga.
0 comments:
Post a Comment