Meri Pehchaan

Kehne ko zyaada mere paas nahi,
Bas ek chhoti kahaani hai.
Chhote chhote hisson me,
Jo mujhe sunaani hai.

Kuch pariyon ke kisse,
Kuch bachpan ki shaitaani hai.
Kuch guzre kal ki baatein hain,
Yaadein jo aaj suhaani hain.

Kuch cheezein hain jo jeevan me,
Khush kismati se seekhi hain,
Un sabhi ki bas ek jhalak,
Yahaan mujhe dikhlaani hai.

Kavi samajhna mujhe,
Shaayad ek naadani hai.
Kaviyon ki garima par yeh,
Ek badi maanhani hai.

Main toh hun bas shishya ek,
Guru jiski zindagaani hai,
Likhta hun bas woh hi jo,
Zindagi ki meherbaani hai.
Bas itni hi pehchaan meri,
Itni hi meri kahaani hai.

Bas itni hi pehchaan meri,
Itni hi meri kahaani hai.